 Kulankaas oo lagu qabtay maktabadda Peckham
ee koofur bari London, dadkii ka soo qeyb galay waxaa ka
mid ahaa abwaaniinta caanka ah Cali Sugulle Dulcarbeed,
Maxamed Xaashi Dhamac Gaariye, Yuusuf Shaacir, Cali Seenyo
iyo qaar kaloo fara badan oo suugaan aad u xiisa badan halkaa
ka soo jeediyey. Waxaa kaloo halkaa lagu soo bandhigay buugaag
fara badan oo qaarkood ay goobjoog ka ahaayeen qorayaashii
qalinka ku duugay.
Kulankaas oo uu gudoominayey Saciid Jaamac oo ah qore iyo
hal-abuurba waxaa warbixin ka soo jeediyey madaxa ururka
Somali Pen Maxamed Daahir Afrax oo isna ah qoraa weyn aadna
ugu caan baxay buuggii “Maana Faay” oo daabacaadyo badan
laga sameeyey. Mudane Afrax oo u mahad celiyey dadkii ka
soo qeyb galay kulankaas, waxa uu tilmaamay ugu horeyntii
baahida loo qabo kobcinta iyo dhowridda qoraalka soomaaliyeed
iyo hal-abuurka.
Waxa kale oo uu sheegay mudane Afrax in maalmaha soo socda
ay iman doonaan dalkan UK qorayaal dhowr ah oo uu ka mid
yahay Aw Jaamac Cumar Ciise oo dadku ku wada garanayaan
buugiisii diiwaankii Sayid Maxamed, Saalax Xaashi Carab,
Maxamed C. Riiraash, iyo qaar kale. Intaas oo dhan waxaa
hormuud ka noqon doona ee madasha ka dhex muuqan doona abwaannada
aqoonta ka soo galbiyey Geeska Afrika, kuwaas oo badankoodu
ka imanaya Jabuuti oo noqotay xundhurta dhaqanka iyo murtida
ku qoran af Soomaaliga.
Waxaa kale oo imanaya ayuu yiri suugaanley af-maal ah oo
ay ka mid yihiin abwaanka Cabdi Muxumad amiin, Cabduqaadir
Cabdi Shube iyo kuwa kaloo badan iyadoo ay ku soo wareegi
doonaan magaalooyin badan oo ka mid ah dalkan Britain.
Buugta maalintaas la soo bandhigay waxaa ka mid ahaa buugga
la magac baxay “Hal aan tabayey” ee uu qoray Maxamed Baashe
Sh. Xasan oo ka hadlaya taariikhdii iyo suugaantii Xaaji
Aadan A. Af qalooc, Cabdiraxmaan Xaaji Ducaale “Boobe” oo
soo ururiyey maansadii iyo taariikh nooleedkii Alla ha u
naxaruustee C/llaahi Suldaan “Timacadde”, Max'ed Xasan Cismaan
oo ka yimid dalka Mareykanka ayaa isna wuxuu soo bandhigay
buugga “Barbaarinta Dhallaanka” waxaa isna halkaa buugaagtii
uu qoray lagu soo bandhigay qoraaga Soomaaliyeed C/casiis
Cali Ibrahim “Xildhiban”, buugga “Af soomaali - buugga 1aad”
oo uu qoray C/raxmaan Max'ed Abtidoon ay waalidiinta halkaa
ka soo qeyb gashay aad xiiseeyeen, Dr. Axmed Sheekh Maxamuud
oo isna qoray buug qiima badan oo ka hadlaya sida loogu
baahan yahay in la helo wada hadal iyo wada tashi. Hase
yeeshee buugta miiska ka muuqatay ayaa intaa aad uga badnaa.
Dadkii ka soo qeyb galay kulankaas oo aad u badnaa waxaan
ka xusi karnaa Aamina Muuse Wehliye oo aad codkeeda in badan
ka maqasheen idaacadda BBC-da. Ugu dambeyntii waxaa lagu
ballamay kulamada dambe ee la qaban doono maalmaha soo socda.
Abdirahman M. Abtidon
a.abtidon@gmail.com
London, UK
|
