|
Last update: Khamiis- 14 October 2010
Xildhiban Publications;-
 Ra’iisul wasaare Max’ed C/llaahi Max’ed “Farmaajo” wuxuu ku dhashay magaalada Muqdisho sanadkii 1962dii wuxuuna dugsigii hoose & dhexe ka dhigtay dugsigii loo yaqaanay 1da Luulyo ama Foorta Sheikh & Max’ud Xarbi ee magaalada Muqdisho, halka dugsigii sarena ka baxay dugsigii Farsamada Gacanta ee Lafoole.
C/llaahi Max’ed “Farmaajo” wuxuu shaqadii ugu horreysay ka bilaabay wasaaraddii arrimaha dibedda ee jamhuuriyadda dimoqraadiga Soomaaliya dabayaaqadii sanadkii 1982dii, halkaas oo uu ka hayay shaqada “Archivio Centrale”, muddo gaaban ka dibna wuxuu u soo wareegay xafiiska maamulk lacagta halkaas oo uu ka noqday Auditor.
Sanadkii 1985tii waxaa loo soo bedallay safaaradda Soomalaida ee magaalada Washington D.C ee dalka Mareykanka, halkaas oo uu ka noqday madaxa maamulka lacagta ee safaaradda Soomaalida, wallow sanadkii 1988dii looga yeeray wasaradda arrimaha dibedda ee magaalada Muqdisho, ka dibna uu magangelyo siyaasadeed weydiistay dalka Mareykanka.
C/llaahi Max’ed “Farmaajo” wuxuu waxbarashadiisii dhinaca jaamacadda ku dhammeystay jaamacadda State University of New York at Buffulo wuxuuna ka qaatay shahaadada Master Degree, waxbarashadiisii ka dibna wuxuu mas’uuliyado kala duwan ka qabtay maamulka dowladaha hoose ee magaalada Buffalo, gaar ahaan Erie County ee Buffalo sidoo kalena wuxuu madax ka noqday xafiiska guryeynta ee magaalada Buffalo ee daryeelka shaqaalaha, waxaana markii dembe loo magacaabay “Buffalo Renewal Agency”.
Sanadkii 2000 waxaa loo magacaabay madaxa xafiiska isku xirka ganacsatada dadka laga tirada badan yahay “Erie county Minority Business Enterprise Co-ordinator” ee magaalada New York ee dalka Mareykanka, sidoo kalena waxaa sanadkii 2002da loo magacaabay in uu noqdo madaxa xuquuqul insaanka ee wasaaradda gaadiidka ee gobolka New York.
 Ugu dambeyntii Max’ed C/llaahi Max’ed “Farmaajo” waa Professor wax ka dhiga jaamacadda State University of New York at Erie Community, halkaas oo uu ka dhigo maadooyinka Leadership Skills, Project Management, Art of thinking and Negotiation and Conflict Resolution.
Max’ed C/llaahi Max’ed “Farmaajo” waxaa loo magacaabay ra’iisul wasaaraha dowladda KMG ah ee dalka Soomaaliya taariikhdu markii ay aheyd 14kii bishii oktoobar sanadka, 2010, iyadoo laga sugayo in ay dowladdiisu wax ka qabato xaaladda ka taagan dalka ay dagaalladu aafeeyeen ee Soomaaliya.
Magacaabidda ra’iisul wasaare Max’ed C/llaahi Max’ed “Farnaajo waxay timid ka khilaafkii ragaadiyay xukuumaddii ra’iisul wasaarihii iska casilay xilka ee xukuumaddii uu hoggaaminayay ee C/rashiid Cali Sharmaarke.
 
Munaasabaddii lagu magacaabay ra’iisul wasaaraha cusub MD. Max’ed C/llaahi Max’ed “Farmaajo”. Muqdisho, Soomaaliya. 14kii Oktoobar 2010
|
